Nagavci kritikon ashpër Armend Zemajn: Gjuha fyese dhe agresiviteti nuk kanë vend në Kuvend

Përmes një postimi, Nagavci e ka cilësuar të papranueshme sjelljen e Zemajt, duke theksuar se gjuha fyese dhe agresiviteti nuk kanë vend në institucionet e vendit, por as në shoqëri.

Ajo ka thënë se kjo nuk është hera e parë që deputeti Zemaj shfaq sjellje të tilla, duke i cilësuar ato si të përsëritura dhe dëshmi të mungesës së kulturës së debatit, edukatës dhe respektit për mendimet ndryshe.

Sipas Nagavcit, një gjuhë e tillë përcjell mesazh të gabuar në shoqëri dhe krijon një shembull negativ për brezat e rinj, duke rrezikuar që fyerjet dhe agresiviteti të normalizohen si pjesë e debatit politik.

Deputetja e LVV-së ka theksuar veçanërisht rëndësinë e respektimit të grave në politikë, duke nënvizuar se përkushtimi i tyre për të përfaqësuar qytetarët, për të mbrojtur qëndrimet dhe për të ushtruar përgjegjësitë institucionale nuk duhet të cenohet nga fyerjet apo përpjekjet për frikësim.

Nagavci ka bërë të ditur se sjelljet e tilla nuk e ndalin dhe as nuk e intimidojnë, duke ritheksuar se gratë në politikë nuk kanë nevojë për lejen e askujt për të ngritur zërin, për të shprehur qëndrimet e tyre dhe për të ushtruar mandatin me dinjitet.

Në reagimin e saj, ajo ka kërkuar që debati politik të zhvillohet përmes argumenteve dhe jo përmes fyerjeve, shpifjeve apo sulmeve personale.

“Debati politik duhet të zhvillohet me argumente, jo me fyerje e frikësim”, ka shkruar Nagavci në reagimin e saj.