Çmimi Nobel për Shkencat Ekonomike për vitin 2025 iu dha Joel Mokyr, Philippe Aghion dhe Peter Howitt “për shpjegimin e rritjes ekonomike të nxitur nga inovacioni”.

Mokyr ndihmoi në identifikimin e parakushteve për rritje të qëndrueshme përmes progresit teknologjik, ndërsa Aghion dhe Howitt do të marrin së bashku gjysmën tjetër “për teorinë e rritjes së qëndrueshme përmes shkatërrimit krijues”.

“Laureatët na kanë mësuar se rritja e qëndrueshme nuk mund të merret si e mirëqenë. Puna e tyre tregon se ne duhet të jemi të vetëdijshëm për kërcënimet ndaj rritjes së vazhdueshme dhe si t’u përgjigjemi atyre”, thuhet në deklaratën e Komitetit të Nobelit.

Çmimi i Ekonomisë njihet zyrtarisht si Çmimi i Bankës së Suedisë në Shkencat Ekonomike në Kujtim të Alfred Nobelit.

Javën e kaluar u shpallën çmimet Nobel 2025 për Fizikë, Kimi, Paqe dhe Letërsi.