Tre dekada pas krijimit të saj, opera e vetme e Ennio Morricone, “Partenope”, ngjitet sonte për herë të parë në skenën e Teatro San Carlo të Napolit, sipas AP.

Ajo rikthen në jetë një krijim të gjatë të injoruar të kompozitorit të njohur botërisht për muzikën e filmave si “The Good, the Bad and the Ugly” dhe “The Untouchables”.

Opera është frymëzuar nga sirena mitologjike Partenope, e cila sipas legjendës u mbyt duke mos mundur të magjepste Uliksin.

Trupi i saj u shpërnda përgjatë brigjeve, duke krijuar bazën e qytetit që më vonë u shndërrua në Napolin modern.

Kur Morricone e shkroi operën në vitin 1995, ai nuk ishte njohur ende si kompozitor i operave, dhe vepra e tij qëndroi e panjohur për dekada, ndërsa festivale dhe projekte të tjera për ringjalljen e saj dështuan.

Ai nuk arriti ta shihte operën të interpretuar përpara se të ndahej nga jeta në 2020.

Regjisorja Vanessa Beecroft dhe dirigjenti Riccardo Frizza interpretuan veprën duke u bazuar vetëm tek partiturat e lëna nga Morricone, duke respektuar zgjedhjet e tij unikale muzikore: orkestër pa violina, me flauta, harpa, kornat dhe instrumente tradicionale napolitane si tamburinat.

Teatri ”San Carlo” ishte i mbushur gjatë provës së hapur, ndërsa banorët e Napolit festuan rikthimin e një pjese të rëndësishme të kulturës së tyre.

Legjenda e Partenope është pjesë e trashëgimisë kulturore të qytetit dhe simbolizon shpirtin e përjetshëm të Napolit.

Protagonistja e operës interpretohet nga dy soprano njëkohësisht, duke pasqyruar natyrën e saj të dyfishtë si trup dhe mit. Opera shënon gjithashtu kulmin e festimeve për 2 500-vjetorin e themelimit të Napolit dhe simbolizon rikthimin e qytetit në kulturën dhe artin botëror.

“Ishte kënaqësi e madhe të dëgjoje muzikën e Morricones, protagonistja e vërtetë e kësaj opere”, tha një student kinematografie pas provës së hapur.

“Shpirti i tij është rikthyer dhe na ka magjepsur”, shtoi ai./ atsh/ KultPlus.com