Kreu i Aleancës për Shqiptarët, Arben Taravari, ka shpallur sot kandidaturën e tij për zgjedhjet presidenciale në Maqedoninë e Veriut.

Në një deklaratë për media Taravari kërkoi mbështetjen e qytetarëve duke thënë se në RMV ka ardhur koha që më në fund të ketë dhe një president shqiptar.

“Me propozim të ASH-së dhe mbështetjes së Lëvizjes Europiane për Ndryshim, unë sot jam këtu për të shpall kandidaturën për president të shtetit…Unë besoj se kjo ditë është ditë e duhur për t’ia filluar. Jam i sigurt në përkrahjen tuaj, pres me respekt votën e çdonjërit prej jush. Vendit i ka ardh koha që të ketë një president shqiptar por jo teknikisht. Ndryshimi ka filluar dhe kjo tani po shihet”, tha Taravari.

Sipas euronews.al, zgjedhja e një presidenti shqiptar në Maqedoninë e Veriut duket praktikisht e pamundur nëse ai nuk mbështetet nga një forcë politike maqedonase.

Përndryshe, Taravari në këtë mënyrë bëhet politikani i parë i cili shpall zyrtarisht kandidaturën për president.