Kryeshefi Ekzekutiv i Inspektoratit Policor të Kosovës, Kushtrim Hodaj, ka thënë se gjatë viti 2023 kanë rekomanduar suspendimin e 71 punonjësve policor të gradave dhe niveleve të ndryshme për përfshirje në vepra të ndryshme kriminale, raporton Ekonomia Online.

Hodaj këto të dhëna i dha gjatë raportimit në Komisionin për Çështje të Sigurisë dhe Mbrojtjes për raportin vjetor të punës për vitin 2023, ku tha se gjatë viti të kaluar kanë hetuar 178 të dyshuar, prej tyre 156 punonjës policor dhe 22 qytetarë që kanë qenë në raste të përbashkët me zyrtarët policor.

Ai ka thënë se kanë arrestuar edhe 35 punonjës të PK dhe qytetarë.

“Viti 2023 ka qenë një vit i suskesshëm në përmbushjen e mandateve tona. Lufta kundër korrupsion vazhdon që të jetë një ndër prioritete tona. Kemi arritur ta rrisim besueshmërinë tek qytetarët. Jemi angazhuar që të rrisim besimin qytetar në sistemin e trajtimit të ankesave. Kemi pranuar 1697 ankesa gjatë vitit 2023, të pranuar nga qytetarët. 32 për qind të këtyre ankesave i kemi orientuar për hetim penal. Jemi angazhuar Në parandalimin dhe luftimin e krimit dhe keqmenagjimit. Kemi hetuar 178 të dyshuar, prej tyre 156 punonjës policor dhe 22 qytetarë që kanë qenë në raste të përbashkëta me zyrtarët policor. Kemi ngritur 74 kallëzime penale ndaj të dyshuarve, kemi arrestuar 35 punonjës dhe qytetarë. Kemi rekomanduar suspendimin e 71 punonjësve policor të gradave dhe niveleve të ndryshme”, ka thënë ai.

Në mungesë kuorumi pasi që në sallë në fillim të mbledhjes ishin veç pesë anëtarë të komisionit, sipas kryetarit të Komisionit, Bekë Berisha, Hodaj do të duhej që vetëm ta paraqiste raportin për vitin 2023, përderisa sipas Berishës, sipas rregullores së Kuvendit në mungesë kuorumi deputete nuk mund të parashtronin pyetje.

Por më vonë në mbledhjen e këtij Komisioni me ardhjen e deputetit të PDK-së, Hisen Berisha, u bë kuorumi i nevojshëm që anëtarët e Komisionit të vazhdonin me pyetjet ndaj zyrtarëve të IPK-së.

IPK-ja është duke hetuar konkursin e gradimit për rreshterë në Policinë e Kosovës