“Çikat në TIK”, është ngjarje që ka shumë vite që organizohet në qendra të ndryshme të Kosovës, në kuadër të Ditës Ndërkombëtare të Vajzave në Teknologji.
Me këtë rast, nënkryetari i Komunës, Sevdi Dernjani; drejtori i Arsimit, Hisni Luri; drejtoresha për Zhvillim Ekonomik, Majlinda Kaloshi; si dhe drejtoresha për Shëndetësi dhe Mirëqenie Sociale, Kimete Kuka-Hasallari, vizituan në dy takime të ndara Sh.F.M.U. “Ilaz Thaçi” dhe Sh.M.L. “Dardania”, ku mbajtën ligjëratë me temë “Çikat në TIK” për nxënëset e të dyja shkollave, si dhe realizuan aktivitet vetëm me to, në kabinetet e teknologjisë dhe informatikës.
Në fund, përfaqësuesit komunalë ofruan mbështetje për përfshirjen e vajzave në lëndët e teknologjisë dhe informacionit, njëherësh duke bërë thirrje që mos të stigmatizohen orientimet e vajzave tona në fushën e TIK-ut.
“Profesionet nuk kanë gjini dhe si të tilla kërkojnë vetëm mendje të mprehta dhe persona që admirojnë teknologjinë”, theksohet në njoftimin e Komunës së Hanit të Elezit.