Drejtori i Shërbimeve Publike në Komunën e Prishtinës, Ilirik Musliu në një intervistë për Ekonomia Online ka bërë të ditur se kanë formuar një Taskë-Forcë me qëllim transformimin e kryeqytetit.

Sipas tij, ky mekanizëm do të dalë me rekomandime sa i përket shumë çështjeve. Musliu thotë shumë rregullore nuk janë përditësuar, prandaj edhe janë paraqitur probleme që po mundohen që t’i sanojnë, siç është ajo për funksionimin e taksive.

Tutje, ai theksoi se janë duke punuar në rregulloren për “Prishtina Parking”, pas ankesave të shumta nga qytetarët.

“Ne jemi duke punuar me Bankën Botërore sa i përket mobilitetit. Dhe kemi krijuar edhe një Task-Forcë brenda komunës së Prishtinës. Task-Forca do të dalë edhe me rekomandime të reja me qëllim që të bëhet transformimi i kryeqytetit”.

“Ne jemi dëshmitar se edhe qyteti po rritet e ndërtohet ndërsa rregulloret nuk janë përditësuar ato janë shumë të vjetra. Është shumë vështirë edhe me iu plotësuar kriteret e asaj rregullore sepse nuk përkojnë me gjendjen reale në të cilën gjendet kryeqyteti andaj jemi duke punuar me një grup punues në rregulloren e taksive. Jemi duke punuar poashtu edhe në rregulloren e Prishtina Parking. Jemi dëshmitar edhe të ankesave të cilat kemi prej qytetarëve sa i përket Prishtina Parkingut prandaj jemi duke punuar në rregulloren e re”.

Musliu tha se do t’i japin zgjidhje edhe menaxhimit të mbeturinave, duke theksuar se do të shtohet edhe numri i kontenierëve.

Ai ka sqaruar se do të nënshkruhet kontrata e re për mirëmbajtjen e ndriçimit publik, raporton EO.

“Gjithashtu jemi duke punuar edhe në rregulloren e menaxhimit të mbeturinave e cila ka shumë mangësi probleme. Edhe me rregulloren e menaxhimit të mbeturinave do t’i japim zgjidhje të përhershme edhe problemit me menaxhimin. Ne jemi duke punuar me GIZ-in dhe kemi bërë një zonim të kryeqytetit i cili ka qenë edhe premtim i kryetarin Rama. Kemi dalë me disa gjetje dhe do të rrisim numrin e lokacioneve. Do të shtohet edhe numri i kontenierëve. Po punojmë në 5 lokacionet e mbeturinave që të jenë nëntokësore e që nuk kanë qenë funksionale”.

“Problem tjetër që jemi duke trajtuar është ndriçimi publik është prej telasheve që kemi trashëguar. Kemi proceduar me kontratën e re dhe po presim nënshkrimin e kontratës që do të bëhet mirëmbajtja e ndriçimit publik. Banesat që janë të pabanueshme gjendja e tyre nuk është e mirë. Ne kemi sektorin e mbrojtjes dhe shpëtimit dhe në teren kanë identifikuar disa prej lokacioneve boshe dhe ato po trajtohen. Kemi inkuadru edhe inspeksionin me qëllim që t’i marrim të gjitha masat”.