Ministri Likaj vizitoi Suharekën dhe Malishevën, informohet për përgatitjet për fillimin e vitit shkollor

Prishtinë | 24 Kor 2020 | 17:03 | Nga Ekonomia Online

Ministri i Arsimit dhe Shkencës, Ramë Likaj, ka vizituar sot komunat e Suharekës dhe të Malishevës, ku është pritur nga kryetarët e komunave Bali Muharremaj dhe Ragip Begaj, si dhe drejtorët komunalë të arsimit në këto komuna.

Qëllimi i vizitave që po i bën ministri Likaj nëpër komuna është që të shohë nga afër përgatitjet që po bëhen në nivelin lokal për fillimin e vitit të ri shkollor, si dhe bashkërendimi i aktiviteteve në këtë drejtim.

Ministri Likaj ka përgëzuar kryetarët Muharremaj dhe Begaj, si dhe drejtorët e DKA-ve për punën që kanë bërë në organizimin e mësimit online, si dhe për përfundim të suksesshëm të vitit shkollor.

Megjithatë, Ministri vuri në theks nevojën për t’u përgatitur mirë në mënyrë që t’i përgjigjemi çfarëdo situate që mund të sjellë pandemia dhe në arsim të ketë gjithëpërfshirje, por të mos mungojë as cilësia.

Po ashtu, Ministri ka biseduar me udhëheqësit komunalë edhe për projektet e rëndësishme që pritet të realizohen nëpër këto komuna në të gjitha nivelet e arsimit.

(Artikull i sponsorizuar)

Të ngjashme