Partia më e madhe në vend (PDK) është e interesuar që Kosova të shkojë në zgjedhje të parakohshme parlamentare pasi ka frikë se rezultati i zgjedhjeve lokale mund të jetë i pafavorshëm. Një skenar i tillë do të kishte efekte negative për partinë nëse zgjedhjet e përgjithshme do të mbahen vitin tjetër, shkruan sot Gazeta “Zëri”

Drejtues të partisë më të madhe në vend (PDK) janë të interesuar që Kosova të shkojë në zgjedhje ta parakohshme parlamentare nga frika e rezultatit zgjedhor të zgjedhjeve lokale të këtij viti.

Kështu bëjnë të ditur burime të gazetës “Zëri”, sipas të cilave krerët e partisë kanë frikë se në zgjedhje lokale të këtij viti mund të pësojnë “debakël”, e cila mund të reflektonte në rezultatin e zgjedhjeve të rregullta parlamentare që duhet të mbahen në qershor të vitit tjetër.

Sipas këtyre burimeve, PDK-ja përpos që nuk ka gjasë ta fitojë Prishtinën në zgjedhje, ka rrezik që ta humbë edhe Prizrenin, apo siç e kanë quajtur “Jerusalemin e PDK-së”, për shkak të keqmenaxhimit që ka ndodhur në atë Komunë për vite me radhë.

Analistët politikë pohojnë se PDK-ja ka frikë nga rezultati i zgjedhjeve lokale të këtij viti, prandaj është e interesuar që të shkojë në zgjedhje të parakohshme parlamentare, ndonëse kjo mohohet nga drejtuesit e partisë më të madhe në vend.