Ekonomia Online
FUNDIT

Shahini: Investitorët po tregohen më të rezervuar, ndërsa Shqipëria rrezikon shtyrjen e investimeve të reja

Shahini: Investitorët po tregohen më të rezervuar, ndërsa Shqipëria rrezikon shtyrjen e investimeve të reja

Aleanca Kosovare e Bizneseve (AKB) ka shprehur shqetësimin për klimën e pasigurisë që, sipas saj, po krijohet nga tensionet politike dhe protestat e vazhdueshme në Shqipëri, duke paralajmëruar për ndikimin e tyre në investime, zhvillimin ekonomik dhe funksionimin normal të bizneseve.

AKB thekson se e drejta demokratike për protestë duhet respektuar, por përplasjet politike nuk duhet të pengojnë zhvillimin ekonomik, sigurinë e qytetarëve dhe veprimtarinë e bizneseve.

Kryetari i AKB-së, Agim Shahini, ka bërë të ditur se një pjesë e investitorëve kosovarë po tregohen më të rezervuar dhe po ngadalësojnë vendimmarrjen për investime të reja në Shqipëri.

Sipas tij, pasiguria politike, tensionet institucionale dhe mungesa e një klime të qëndrueshme ndikojnë drejtpërdrejt në besimin e investitorëve dhe planet afatgjata të biznesit.

“Investitorët nuk investojnë aty ku mungojnë stabiliteti, siguria juridike dhe parashikueshmëria”, thekson Shahini.

Ai u ka bërë thirrje pozitës, opozitës dhe institucioneve shqiptare që përmes dialogut dhe përgjegjësisë shtetërore të krijojnë një klimë të qëndrueshme për investime.

Sipas AKB-së, Shqipëria nuk duhet të rrezikojë humbjen apo shtyrjen e investimeve për shkak të krizave politike, ndërsa ekonomia nuk duhet të mbetet peng i interesave partiake.

Në reagimin e saj, AKB nënvizon se marrëdhëniet ekonomike ndërmjet Kosovës dhe Shqipërisë duhet të forcohen, duke krijuar më shumë mundësi për investime, prodhim, eksporte dhe punësim.

“Kapitali nuk pret pafundësisht – ai shkon aty ku gjen siguri, stabilitet dhe perspektivë”, ka deklaruar Agim Shahini, kryetar i Aleancës Kosovare të Bizneseve (AKB).

Të ngjashme