NATO ka bërë një reagim të gjatë me shkrim pas refuzimit të Rusisë që të marrë pjesë në dialog, duke vazhduar luftën në Ukrainë.

NATO, me anë të një komunikate e ka bërë fajtor edhe Bjellorusinë, që ka mundësuar pushtimin e Ukrainës.

“Ne dënojmë me termat më të ashpër të mundshëm pushtimin e plotë të Ukrainës nga Rusia, të mundësuar nga Bjellorusia. I bëjmë thirrje Rusisë që të ndërpresë menjëherë sulmin e saj ushtarak, të tërheqë të gjitha forcat e saj nga Ukraina dhe të kthehet prapa nga rruga e agresionit që ka zgjedhur”, thuhet në komunikatë.

“Tani po bëjmë dislokime shtesë të rëndësishme mbrojtëse të forcave në pjesën lindore të Aleancës. Ne do të bëjmë të gjitha dislokimet e nevojshme për të siguruar parandalim dhe mbrojtje të fortë dhe të besueshme në të gjithë Aleancën, tani dhe në të ardhmen. Masat tona janë dhe mbeten parandaluese, proporcionale dhe jo-përshkallëzuese”, thuhet në reagimin e tyre.

“Angazhimi ynë ndaj nenit 5 të Traktatit të Uashingtonit është i hekurt. Ne qëndrojmë të bashkuar për të mbrojtur të gjithë aleatët. Liria gjithmonë do të fitojë mbi shtypjen”, përfundon njoftimi.

Neni 5 i Traktatit të Uashingtonit parasheh se “çdo anëtar i NATO-s pajtohet se do ta konsiderojë sulmin e armatosur kundër çdo shteti anëtar, qoftë në Evropë apo Amerikën e Veriut, si një sulm kundër të 30 anëtarëve të organizatës.