Hungaria gjen 20 milionë dollarë të fshehura në pyje, ferma dhe depo, në hetimin ndaj ish-ministrit të Orbanit

Kryeministri Peter Magyar e largoi nacionalistin Orban nga pushteti pas 16 vitesh qeverisjeje, në zgjedhjet e prillit, duke premtuar përmirësimin e marrëdhënieve me Bashkimin Europian, të cilat ishin dëmtuar nga konfliktet e vazhdueshme gjatë qeverisjes së Orbanit, si dhe nisjen e një fushate të gjerë kundër korrupsionit.

Dy ish-ministra të qeverisë së Orbanit dhe ish-guvernatori i Bankës Qendrore, Gyorgy Matolcsy, janë arrestuar në kuadër të hetimeve të ndara për akuza korrupsioni. Ata i kanë mohuar akuzat për shkelje.

Autoritetet kanë ndaluar gjithashtu edhe vëllain e Orbanit, në një rast që lidhet me trafikimin e qenieve njerëzore, të cilin ish-lideri e kishte cilësuar si një akt hakmarrjeje politike.

Kjo fushatë kundër korrupsionit është pjesë e aksionit që kryeministri i qendrës së djathtë, Magyar, e ka pagëzuar me emrin “Operacioni Purgatori”. Kjo nismë konsiderohet “shumë e rëndësishme” nga 70 për qind e të anketuarve, sipas një sondazhi të realizuar nga instituti Median dhe të publikuar këtë javë në portalin e lajmeve HVG.

“Gjatë kontrolleve, hetuesit gjetën shuma të mëdha parash të groposura në pyje, të fshehura në ndërtesa fermash, depo dhe një pronë banimi, si dhe të ruajtura në një kasafortë me vlerë të lartë, në një lokacion të izoluar”, njoftoi të premten vonë Zyra Kombëtare për Rikuperimin dhe Mbrojtjen e Pasurive.

Paratë e sekuestruara – 5.07 miliardë forinta (15.33 milionë dollarë), 2.66 milionë euro (2.93 milionë dollarë) dhe 1.26 milionë dollarë – u deshën 12 punonjësve të Thesarit të Shtetit plot tetë orë për t’i numëruar, duke përdorur pesë makina për numërimin e kartëmonedhave, tha ministri i Financave, Andras Karman.

Sesztak, i cili ishte ministër i Zhvillimit në qeverinë e Orbanit nga viti 2014 deri në vitin 2018, i ka mohuar akuzat për shkelje. Avokati i tij, Gabor Papp, nuk iu përgjigj një kërkese për koment, të dërguar me email lidhur me deklaratën e Zyrës për Rikuperimin e Pasurive.

Magyar tha se paratë e rikuperuara shënojnë fundin e asaj që ai e përshkroi si një “mafie”, të udhëhequr nga partia e djathtë Fidesz e Orbanit dhe aleatët e saj kristiandemokratë gjatë 16 viteve të qeverisjes së tij.

Politologu Gabor Torok tha se pamjet e grumbujve të mëdhenj të parave ishin aq tronditëse dhe të qarta, saqë me gjasë i kanë dhënë një goditje vendimtare partisë Fidesz. Sipas një sondazhi të institutit Median, mbështetja publike për këtë parti ishte përgjysmuar, duke rënë në vetëm 16 për qind të votuesve deri në muajin nëntor, krahasuar me nivelet para zgjedhjeve.