Dyshohet se ia kërkoi 170 euro një qytetari, kërkohet paraburgim ndaj zyrtarit në Gjakovë

Prokuroria Themelore në Gjakovë ka kërkuar caktimin e masës së paraburgimit për 30 ditë ndaj të pandehurit me inicialet Q.I., i cili akuzohet për veprën penale të marrjes së ryshfetit.

Kështu është bërë e ditur në një njoftim për media, ku thuhet se ekziston dyshimi se më 21 gusht 2024, në cilësinë e zyrtarit të Zyrës së Gjendjes Civile në Gjakovë, në njësinë e Ponoshecit, i pandehuri ka kërkuar në mënyrë të paligjshme shumën prej 170 eurosh nga një qytetar.

Njoftimi i plotë:

“Gjakovë, 23 gusht 2024 – Prokuroria Themelore në Gjakovë, Departamenti i Krimeve të Rënda, ka paraqitur një kërkesë në Gjykatën Themelore për caktimin e masës së paraburgimit për 30 ditë ndaj të pandehurit me inicialet Q.I., i cili akuzohet për veprën penale të marrjes së ryshfetit.

Sipas kërkesës së Prokurorisë, ekziston dyshimi i bazuar se më 21 gusht 2024, në cilësinë e zyrtarit të Zyrës së Gjendjes Civile në Gjakovë, në njësinë e Ponoshecit, i pandehuri ka kërkuar në mënyrë të paligjshme shumën prej 170 eurosh nga një qytetar – i dëmtuari, me qëllim që të sigurojë një përfitim pasuror të kundërligjshëm për veten e tij. Ky përfitim ishte për gjenerimin e numrit personal në sistemin elektronik të ARC-së për bashkëshorten e të dëmtuarit.

Prokuroria ka argumentuar se këto veprime formojnë dyshimin e bazuar se i pandehuri ka kryer veprën penale të marrjes së ryshfetit sipas nenit 421, paragrafi 1 të Kodit Penal të Republikës së Kosovës (KPRK). Procesi gjyqësor për këtë rast është në zhvillim e sipër”.Thuhet në raport.