Xherdan Shaqiri mund të rikthehet në Evropë, Turqia opsion për ta vazhduar karrierën

Xherdan Shaqiri ka një vit që është transferuar në elitën e futbollit amerikan MLS.

Sulmuesi me prejardhje nga Kosova është bashkuar me Chicago Fire nga Lyon për shifrën e shtatë milionë eurove, dhe ka kontratë me klubin amerikan deri në fund të vitit 2024.

Agjenti turk, Ahmet Bulut i ka ofruar Trabzonsporit shërbimet e reprezentuesit zviceran edhe pse ai nuk ka mandat për Shaqirin.

Xherdani menaxhohet nga dyshja Erdin dhe Arbër Shaqiri, por Bulut ia ka ofruar shërbimet e gjilanasit drejtuesve të Trabzonsporit.

“Shaqiri nuk është i lumtur në MLS dhe ai dëshiron të kthehet në Evropë. Për momentin ai është në top formë”, u ka thënë Bulut drejtuesve të Trabzonspor kanë raportuar mediat turke.

Ndërkohë mediumi zviceran 4-4-2.ch ka kontaktuar agjentët e Shaqirit, por ata nuk kanë kthyer përgjigje për një rikthim të tij në Evropë.

Gjithsesi kjo mbetet vetëm një thashethem kur jemi në tregun e transferimeve dhe vështirë se Shaqiri mund të largohet nga Chicago pasi ka kontratë edhe për dy vite me klubin amerikan.

31-vjeçari edhe më parë ishte lidhur me një kalim në Turqi, ku skuadrat e mëdha si Galatasaray, Fenerbahce e Besiktas kishin shprehur interesim për të.