Komiteti për menaxhimin dhe parandalimin e përhapjes së COVID-19, nën udhëheqjen e kryetarit të Gjilanit, Lutfi Haziri, ka mbajtur takimin për vlerësimin e situatës për dy ditët e fundit.

Kryetari Haziri ka bërë të ditur se vetëm të enjten, ekipet e QKMF-së u kanë dhënë shërbime në shtëpi 54 pacientëve të prekur me COVID-19, derisa bëri të ditur se numri i rasteve aktive në këtë komunë është 337.

Ai ka apeluar qytetarët dhe bizneset që japin shërbime që të vazhdojnë t’i respektojnë masat, bartjen e maskës dhe mbajtjen e distancës sociale.

Pasqyra e përgjithshme në Gjilan që prej fillimit të pandemisë nga 14242 mostra, 4074 kanë rezultuar pozitivë, 3624 janë shëruar dhe 113 qytetarë e kanë humbur betejën me virusin.

Ndërsa 337 raste janë aktivë, 75 persona me COVID-19 janë të hospitalizuar dhe 293 mostra në pritje për rezultat.