Zyrtarë të partisë opozitare në Podujevës, PDK, kanë kërkuar nga komunarët që sa më parë të fillojnë mbajtjen e kuvendeve për zgjedhjen e përfaqësuesve të fshatrave. Këshilltari i kësaj partie, Rafet Llapashtica, ka thënë se kjo është zvarritje e qëllimshme nga Komuna e Podujevës.

Sipas tij, vonesa e përzgjedhjes së këtyre përfaqësuesve është me pasoja për qytetarët, shkruan sot Koha Ditore.

“Zvarritja e përzgjedhjes së kryetarëve të fshatrave është mase e tepruar. Tani me të gjitha elementet juridike dhe me udhëzimin administrativ që është në fuqi është obligim ligjor i të gjitha komunave që të përzgjedhin kryetarët e fshatrave të cilët duhet të jenë njerëz jopolitikë, me një fjalë të mos jenë të zgjedhur politikë të ndonjë subjekti apo bartës të funksioneve politike”, ka thënë Rafet Llapashtica.

“Kjo zvarritje është e qëllimshme nga Komuna e Podujevës sepse e dinë që në çdo fshat dhe lagje qyteti më nuk do të mund të emërojë në bazë të dëshirës askënd përgjegjës të fshatit apo lagjeve të qytetit. Pasojat e moszgjedhjes të këtyre përfaqësuesve janë të mëdha për qytetarët që jetojnë atje, sepse çdo investim apo subvencionim nga Komuna tani bëhet vetëm në baza politike apo partiake e jo në bazë të nevojave primare të qytetarëve si tatimpagues”.

Moszgjedhja e tyre, sipas tij, luan rol edhe në sigurinë e fshatit apo lagjes së qytetit.