Komunës që e shpalli e para fitoren ndaj COVID-19, në fillim të këtij muaji iu rikthyen rastet me këtë sëmundje. Ditën e parë të qershorit atje u konfirmuan pesë raste me koronavirusin e ri, si pasojë e vizitave mes familjarëve për festën e Bajramit.
Vizitave të familjarëve gjatë festës së Bajramit ua pa sherrin një familje nga fshati Dobërdol i Podujevës. Katër anëtarë të kësaj familje u infektuan me koronavirusin e ri pas vizitës së një familjari nga Prishtina atë ditë, kurse rasti i pestë kishte ardhur nga Austria.
Pesë raste aktive me koronavirus në Podujevë, priten rezultatet edhe për pesë persona sot
Të njëjtit po vazhdojnë të jenë në vetëizolim që nga 1 qershori. Detaje rreth gjendjes së tyre dhe testimeve që do të kryhen sot ka dhënë specialistja Bedrie Rama, e cila është pjesë e Shtabit Emergjent në këtë komunë.
Rama i ka thënë Gazetës Express se gjendja e të infektuarve është e mirë dhe pa simptoma. Sipas saj, të njëjtit do të ritestohen pas tri-katër ditësh për të parë nëse janë shëruar.
Ajo tregon se sot do të testohen pesë banorë të kësaj komune, rezultatet e të cilëve pritet të publikohen në mbrëmje.
“S’kemi pas raste të reja që nga tre qershori. Aktualisht i kemi pesë raste aktive, të cilat do të ritestohen pas 3-4 ditësh për të parë nëse janë shëruar, e që po besojmë që po. Gjendja e të infektuarve është e mirë dhe asnjëri nuk kanë simptoma. Jemi në kontakt çdo ditë me ta. Sonte i presim edhe rezultatet për pesë persona, të cilët kanë pasur kontakt me të infektuarit”, ka thënë Rama.
Ndryshe, dje në Laboratorin e Mikrobiologjisë Molekulare në IKSHPK me metodën RT-PCR, janë testuar gjithsej 280 mostra të marra nga Klinika Infektive dhe gjurmimi i kontakteve të rasteve në terren.
Nga testimi i këtyre mostrave, me COVID-19 janë konfirmuar 29 raste.
“Rastet pozitive janë nga: komuna e Prishtinës 13 raste (sipas vendbanimit: 13 raste Prishtinë), komuna e Obiliqit 8 raste (sipas vendbanimit: 8 raste Milloshevë), komuna e Vushtrrisë 2 raste (sipas vendbanimit: 1 rast Druvar dhe 1 rast Vushtrri) dhe me nga 1 rast vendbanimet: Zhiti-Viti, Lutogllavë-Prizren, Shushicë-Istog, Janjevë-Lipjan, Fushë Kosovë dhe Rahovec”, ka njoftuar IKShP’ja