Në fshatin Senoc të komunës së Rahovecit, kanë nisur punimet në projektin për rregullimin e fushës së hendbollit, rrethojave të fushës së futbollit, oborrin dhe parkingut të Shkollës Fillore “Vëllezërit Frashëri”.

Nisjen e punimeve nga afër i kanë parë sot, kryetari i komunës, Smajl Latifi, i shoqëruar nga Avni Morina, drejtor i Drejtorisë Komunale të Arsimit dhe Daut Krasniqi, kryetar i këshillit të fshatit Senoc

“Sot po i monitorojmë fillimin e punimeve në rregullimin e oborrit dhe parkingut të Shkollës Fillore “Vëllezërit Frashëri” në fshatin Senoc, projekt ky shumë i rëndësishëm për qytetarët dhe nxënësit e këtij fshati. Po rregullohet edhe rrethoja e fushës së futbollit si dhe po bëhet rregullimi i një fushe të hendbollit”, ka thënë kryetari Latifi.

Kurse, Daut Krasniqi, kryetari këshillit të fshatit Senoc, e ka falënderuar kryetarin për vizitën, ndërsa për fillimin e punimeve në projektin për rregullimin e fushës së hendbollit, rrethojave të fushës së futbollit, oborrit dhe parkingut, ka thënë se vërtetë ky projekte është i nevojshëm për kryerjen e aktiviteteve sportive për nxënësit të cilët i vijojnë mësimet në këtë shkollë.